Akademik litseylarga kirish testi natijalari e’lon qilindi
Imtihon natijasidan norozi bo‘lgan abituriyentlar uch ish kuni ichida apellyatsiya shikoyati berishi mumkin.
2026/2027-o‘quv yili uchun respublika oliy ta’lim muassasalari tasarrufidagi akademik litseylarga kirish imtihonlarining yakuniy natijalari (mandat) e’lon qilindi.
Endilikda abituriyentlar o‘z natijalarini my.edu.uz hamda my.gov.uz portallaridagi shaxsiy kabinetlari orqali ko‘rishlari mumkin. Buning uchun MyGov portali yoki mobil ilovasidagi “Shaxsiy kabinet”ga kirib, “Mening arizalarim” bo‘limida akademik litseyga qabul bo‘yicha yuborilgan arizani ochish kifoya.
Qabul natijalari abituriyent to‘plagan ball va arizada ko‘rsatilgan ustuvorlik asosida shakllantirilgan. Ya’ni, o‘quvchilar to‘plagan balliga qarab o‘zlari tanlagan ustuvor akademik litseyga qabul qilinadi.
Shuningdek, belgilangan tartibga muvofiq, test natijalaridan norozi bo‘lgan abituriyentlar yakuniy natijalar e’lon qilingan kundan boshlab uch ish kuni ichida my.edu.uz saytidagi shaxsiy kabineti orqali elektron shaklda apellyatsiya shikoyatini yuborishi mumkin.
Vazirlik akademik litseylarga qabulda ustuvorlik tamoyili bo‘yicha batafsil ma’lumot bilan alohida sharh orqali tanishish mumkinligini ham ma’lum qildi.
