Andijondagi bog‘chada bolalarni haqoratlagan tarbiyachi ishdan bo‘shatildi
Holat Bolalar ombudsmani tomonidan nazoratga olindi.
Ijtimoiy tarmoqlarda Andijon viloyatidagi nodavlat maktabgacha ta’lim muassasasida tarbiyachining bolalarga nisbatan nomaqbul munosabatda bo‘lgani aks etgan videolar tarqaldi. Holat Bolalar ombudsmani tomonidan nazoratga olindi.
Aniqlanishicha, Andijon tumanida joylashgan nodavlat maktabgacha ta’lim muassasasida faoliyat yuritgan tarbiyachi Y. M. tarbiyalanuvchilarga nisbatan qo‘pol muomalada bo‘lgan hamda ularni turli haqoratli va axloqqa zid so‘zlar bilan tahqirlagan.
Mazkur holat yuzasidan xizmat o‘rganishi o‘tkazilib, 2026-yil 28-iyul kuni tarbiyachining mehnat majburiyatlariga zid xatti-harakatlari sabab u bilan tuzilgan mehnat shartnomasi bekor qilingan.
Hozirda holat yuzasidan huquqiy baho berish maqsadida Andijon tumani Ichki ishlar bo‘limi tomonidan tergovga qadar tekshiruv olib borilmoqda.
Bolalar ombudsmani esa bolaning huquqlari to‘liq tiklanishi va holatga qonuniy baho berilishi yuzasidan nazoratni davom ettirishini ma’lum qildi.
