Apple Pay va Google Pay yaqin oylarda O‘zbekistonda ishga tushishi mumkin
Hozirda xizmatlarni texnik jihatdan integratsiya qilish ishlari davom etmoqda.
Apple Pay va Google Pay to‘lov xizmatlari yaqin bir necha oy ichida O‘zbekistonda ishga tushirilishi mumkin. Bu haqda Markaziy bankning To‘lov tizimlarini rivojlantirish departamenti rahbari Jamshid Usmonov ma’lum qildi.
Uning so‘zlariga ko‘ra, shaxsga doir ma’lumotlar to‘g‘risidagi qonunchilikka kiritilgan o‘zgartirishlardan so‘ng Markaziy bank tijorat banklari, Humo va Uzcard milliy to‘lov tizimlari bilan birgalikda Apple hamda Google kompaniyalari bilan muzokaralarni boshlagan. Hozirda xizmatlarni texnik jihatdan integratsiya qilish ishlari davom etmoqda.
Jamshid Usmonovning ta’kidlashicha, tijorat banklari integratsiya jarayonlarini faol olib bormoqda. Xususan, kartalarni tokenizatsiya qilish bilan bog‘liq texnik masalalar ustida ish olib borilmoqda.
Markaziy bank vakili mazkur loyiha faqat xalqaro Visa va Mastercard kartalarini qo‘llab-quvvatlash bilan cheklanib qolmasligini qayd etdi. Uning so‘zlariga ko‘ra, Humo va Uzcard milliy to‘lov tizimlari kartalarini ham Apple Pay va Google Pay xizmatlariga ulash imkoniyatini yaratish ustida ish olib borilmoqda.
Usmonovning bildirishicha, loyiha yuzasidan yaqin bir necha oy ichida ijobiy yangiliklar kutilmoqda. Shuningdek, bir yoki bir nechta tijorat banklari ushbu xizmatlarni O‘zbekistonda birinchi bo‘lib ishga tushirishi mumkin.
Ma’lum qilinishicha, Markaziy bank va Apple hamda Google vakillari o‘rtasidagi muzokaralar joriy yilning aprel–may oylarida bo‘lib o‘tgan va texnik hamkorlik yuzasidan ishlar izchil davom ettirilmoqda.
