Armaniston hukumati iste’foga chiqadi — Pashinyan
2-avgustdan yangi parlament faoliyat boshlaydi, shundan so‘ng Armanistonda yangi hukumat shakllantiriladi.
Armaniston Bosh vaziri Nikol Pashinyan mamlakat hukumati yangi chaqiriq Milliy Assambleya faoliyati boshlanishi munosabati bilan konstitutsiyaga muvofiq iste’foga chiqishini ma’lum qildi.
Pashinyanning aytishicha, hukumatning navbatdagi yig‘ilishi amaldagi Vazirlar Mahkamasi uchun so‘nggi yig‘ilish bo‘ldi.
“Bu bizning oxirgi hukumat yig‘ilishimiz. To‘qqizinchi chaqiriq Milliy Assambleya ish boshlashi munosabati bilan Konstitutsiyaga muvofiq iste’foga chiqamiz”, — degan u.
Ma’lum qilinishicha, hukumat iste’fosidan so‘ng Armaniston prezidenti parlamentdagi ko‘pchilik tomonidan ko‘rsatilgan nomzodni bosh vazir lavozimiga tayinlaydi. Ayni paytda parlamentdagi ko‘pchilikni “Fuqarolik shartnomasi” partiyasi tashkil etadi.
Yangi chaqiriq Milliy Assambleya 2-avgust kuni o‘z faoliyatini boshlaydi. Shundan so‘ng yangi hukumat tarkibini shakllantirish jarayoni boshlanadi.
Eslatib o‘tamiz, iyun oyida Armanistonda parlament saylovlari natijalariga qarshi muxolifat namoyishlari bo‘lib o‘tgan edi. Konstitutsiyaviy sud saylov natijalarini o‘z kuchida qoldirganidan so‘ng ham muxolifat siyosiy kurashni davom ettirishini bildirgan.
So‘nggi parlament saylovlari yakunlariga ko‘ra, “Fuqarolik shartnomasi” partiyasi 49,7 foiz ovoz bilan birinchi o‘rinni egallab, parlamentdagi ko‘pchilikni qo‘lga kiritgan.
