“Chorsu”, “O‘rikzor”, “Qo‘yliq” va yana o‘nlab bozorlar sotuvga qo‘yiladi

 

Toshkent shahridagi 35 ta bozor va savdo kompleksi hamda ularning shoxobchalari ommaviy savdolarga chiqariladi. Bu Prezidentning “Toshkent shahrini 2026–2027-yillarda ijtimoiy-iqtisodiy rivojlantirish bo‘yicha qo‘shimcha chora-tadbirlar to‘g‘risida”gi qarorida belgilandi.

 

Hujjatga ko‘ra, bozor va savdo komplekslarini ommaviy savdolarga chiqarish jarayonida buyurtmachi sifatida “Toshkent invest kompaniyasi” AJ ishtirok etadi. Kompaniya har bir obyekt bo‘yicha alohida biznes loyihasini ishlab chiqadi va aynan shu loyiha asosida investorlarga taklif etiladi.

 

Shuningdek, bozorlarni sotishdan tushadigan mablag‘ning 1 foizi, shuningdek savdoni tashkil etish bilan bog‘liq xarajatlar “Toshkent invest kompaniyasi” AJga yo‘naltiriladi.

 

Qarorga muvofiq, savdoga chiqariladigan bozor va savdo komplekslari hududida zamonaviy ekobozorlar, savdo va xizmat ko‘rsatish markazlari, ko‘ngilochar majmualar hamda ko‘p qavatli avtoturargohlar tashkil etilishi majburiy shart sifatida belgilanmoqda.

 

Ommaviy savdoga chiqariladigan obyektlar ro‘yxatidan quyidagilar o‘rin olgan:

• “Navro‘z dehqon bozori” AJ;

• “Chilonzor buyum savdo kompleksi” AJ;

• “Bek to‘pi savdo kompleksi” MCHJ;

• “Sergeli dehqon bozori” AJ;

• “Iste’molda bo‘lgan transport vositalari va ehtiyot qismlari Sergeli bozori” MCHJ;

• “Parkent universal savdo kompleksi” AJ;

• “Yangiobod ixtisoslashtirilgan bozori” MCHJ;

• “Aviasozlar dehqon bozori” AJ;

• “Qora-qamish dehqon bozori” MCHJ;

• “Farhod dehqon bozori” AJ;

• “O‘rikzor savdo kompleksi” MCHJ;

• “Qo‘yliq dehqon bozori” AJ;

 

Bundan tashqari, “Navro‘z”, “Yunusobod”, “Sergeli” va “Qora-qamish” dehqon bozorlariga qarashli 20 dan ortiq shoxobcha, “Bek to‘pi” avtoturargohi hamda “Beshqo‘rg‘on savdo” MCHJ ham elektron savdolarga chiqariladi.

 

Qarorda yana bir muhim norma belgilangan. Unga ko‘ra, Toshkent shahridagi boshqa dehqon bozorlari, ixtisoslashtirilgan va buyum bozorlari shoxobchalari, shuningdek ularga tegishli bo‘sh turgan yer maydonlari ham tasdiqlanadigan master-rejalar va belgilangan shartlar asosida baholangan qiymatda elektron onlayn auksion savdolariga chiqariladi.