Germaniyada jazirama oqibatida 10 mingga yaqin kishi vafot etdi
Jazirama eng ko‘p keksalar va surunkali kasalliklarga chalingan fuqarolar hayotiga ta’sir ko‘rsatgan.
Germaniya Sog‘liqni saqlash vazirligi tarkibidagi Robert Kox instituti (RKI) ma’lumotlariga ko‘ra, 2026-yilda mamlakatda kuzatilgan kuchli issiqlik to‘lqinlari oqibatida 9 800 ga yaqin kishi vafot etgan.
Institutning bildirishicha, 29-kalendar haftasi holatiga ko‘ra, issiqlik bilan bog‘liq o‘limlar soni taxminan 9 800 nafarga yetgan. Bu ko‘rsatkich issiqlik bilan bog‘liq o‘limlar bo‘yicha prognoz qilingan odatiy darajadan ancha yuqori ekani qayd etilgan.
Mutaxassislar o‘limlarning asosiy qismi iyun oyining oxirida, Germaniyaning ayrim hududlarida havo harorati 40 darajagacha ko‘tarilgan davrda sodir bo‘lganini ma’lum qildi.
Tadqiqot natijalariga ko‘ra, o‘lim holatlarining aksariyati yuqori harorat va mavjud surunkali kasalliklarning birgalikdagi ta’siri oqibatida yuz bergan. Ayniqsa, 85 yoshdan oshgan ayollar issiq ob-havo oqibatlaridan eng ko‘p zarar ko‘rgan guruh sifatida qayd etilgan.
RKI ma’lumotlariga ko‘ra, o‘rtacha havo harorati 20 daraja bo‘lgan kunlarda ham o‘lim ko‘rsatkichlari salqin yoz kunlariga nisbatan sezilarli darajada yuqori bo‘lgan.
Shuningdek, iyun oyi oxirida Yevropada kuzatilgan jazirama davomida 60 ta harorat rekordi yangilangan. Rekord issiqlik Buyuk Britaniya, Fransiya, Germaniya, Italiya, Avstriya, Polsha, Shveysariya, Niderlandiya va boshqa qator davlatlarda qayd etilgan.
