Nukusda alimentdan qarzdor “qochoq ota” qo‘lga tushdi
Qarzdor kuzatuv payti voqea joyidan qochishga harakat qilgan, biroq Ichki ishlar xodimlarining harakati bilan ushlangan.
Nukusda aliment to‘lashdan bo‘yin tovlab, yashirinib yurgan ota bank binosi hududida qo‘lga tushdi. Bu haqida MIB axborot xizmati Zamon.uz'ga maʼlum qildi.
Qayd etilishicha, Fuqarolik ishlari bo‘yicha Nukus tumanlararo sudning ijro hujjatiga asosan undiruvchi Sh.G. foydasiga tarbiyasidagi bir nafar farzandining taʼminoti uchun qarzdor J.K. dan aliment undirish belgilangan.
Qarzdor tomonidan aliment pullari har oy o‘z vaqtida to‘lab kelinmaganligi sababli ijro hujjati ijrosini taʼminlash maqsadida, qarzdorning yashash manziliga bir necha marotaba borilganida, qarzdor ushbu manzilda yo‘qligi aniqlangan.
Shu sababli unga nisbatan Majburiy ijro byurosi Nukus shahar bo‘limi davlat ijrochisi tomonidan qidiruv eʼlon qilingan.
Majburiy ijro byurosi Qoraqalpog‘iston Respublikasi boshqarmasi qidiruv shoʻbasida qarzdor har kuni bir yo‘nalishda Nukus shahri bo‘ylab harakatlanib yurganligi aniqlanib, qarzdorni ushlash rejasi tuzilgan.
Joriy yilning 29 iyul kuni ham qarzdor shu yo‘nalish bo‘ylab harakatga chiqqan va u tezkor xodimlar tomonidan kuzatib borilgan. Qarzdorning bank muassasasiga borishi aniq bo‘lgach, qo‘shimcha reja ishlanib chiqilgan.
Shundan so‘ng qarzdor fuqaro Nukus shahrida joylashgan “Sanoatqurilishbank”iga borganida Ichki ishlar xodimlari tomonidan uning hujjatlari so‘raladi. Shunda qarzdor voqea joyidan qochishga harakat qilgan, biroq Ichki ishlar xodimlarining harakati bilan ushlangan.
Hozirda qarzdor tomonidan aliment to‘lash majburiyatini o‘z vaqtida bajarmaganligi sababli, uning javobgarlik masalasi ko‘rib chiqilmoqda.
