Samarqandda sanitariya xulosasi evaziga pora talab qilgan mansabdor ushlandi
U tadbirkordan sanitariya-epidemiologik xulosani rasmiylashtirib berish evaziga 9 mln so‘m talab qilgan.
Samarqand viloyatida sanitariya-epidemiologik xulosani rasmiylashtirish evaziga noqonuniy pul talab qilgan mansabdor shaxs qo‘lga olindi. Bu haqda DXX xabar berdi.
Aniqlanishicha, Toyloq tumani Sanitariya-epidemiologik osoyishtalik va jamoat salomatligi bo‘limi bo‘linma boshlig‘i o‘zining mansabdor tanishlari orqali yakka tartibdagi tadbirkorga tegishli non va non mahsulotlari ishlab chiqarish sexi uchun sanitariya-epidemiologik xulosani rasmiylashtirib berishni va’da qilgan.
Buning evaziga u 9 mln so‘m talab qilgan. Gumonlanuvchi avval 100 AQSH dollari va 500 ming so‘m olgan bo‘lsa, tezkor tadbir davomida so‘ralgan mablag‘ning bir qismi bo‘lgan 400 AQSH dollarini olayotgan vaqtida ashyoviy dalillar bilan ushlangan.
Mazkur holat yuzasidan gumonlanuvchiga nisbatan jinoyat ishi qo‘zg‘atildi. Hozirda tergov harakatlari davom ettirilmoqda
