Shavkat Mirziyoyev O‘zbekiston xalqini Xalqlar do‘stligi kuni bilan tabrikladi
Davlat rahbari tabrigida O‘zbekistonda 130 dan ortiq millat va elat vakillari ahil yashayotganini qayd etib, professional “Do‘stlik” ansambli tashkil etilishini ma’lum qildi.
Prezident Shavkat Mirziyoyev Xalqlar do‘stligi kuni munosabati bilan mamlakat ahliga bayram tabrigini yo‘lladi. Davlat rahbari o‘z tabrigida O‘zbekistonda hukm surayotgan tinchlik, millatlararo totuvlik va diniy bag‘rikenglikni xalqimizning eng bebaho boyligi sifatida e’tirof etdi.
Prezident ta’kidlaganidek, bugungi kunda mamlakatimizda 130 dan ortiq millat va elat, 16 ta diniy konfessiya vakillari bir oila farzandlaridek ahil va inoq yashab, Yangi O‘zbekiston taraqqiyotiga munosib hissa qo‘shmoqda. Milliy-madaniy xilma-xillik insonparvar davlat barpo etish yo‘lidagi muhim omillardan biri ekani qayd etildi.
Davlat rahbari so‘nggi yillarda “Bizning kuchimiz — birlik va hamjihatlikda” tamoyili asosida millatlararo munosabatlarni rivojlantirish borasida keng ko‘lamli islohotlar amalga oshirilganini eslatdi. Jumladan, Millatlararo munosabatlar sohasida davlat siyosati konsepsiyasi qabul qilinib, milliy madaniy markazlar va do‘stlik jamiyatlarining moddiy-texnik bazasi mustahkamlandi.
Qayd etilishicha, bugungi kunda O‘zbekistondagi ta’lim muassasalarida ta’lim 7 tilda olib borilmoqda, tele va radiokanallarda 12 tilda ko‘rsatuvlar efirga uzatilmoqda, gazeta va jurnallar esa 14 tilda chop etilmoqda. Shuningdek, mamlakatda 157 ta milliy madaniy markaz va 46 ta do‘stlik jamiyati faoliyat yuritmoqda.
Prezident Markaziy Osiyo davlatlari bilan do‘stlik, strategik sheriklik va ittifoqchilik aloqalari izchil rivojlanayotganini alohida ta’kidlab, mintaqada o‘zaro ishonch va yaxshi qo‘shnichilik munosabatlari tobora mustahkamlanayotganini qayd etdi.
Shuningdek, davlat rahbari turli millat vakillaridan iborat professional “Do‘stlik” ansambli tashkil etilishini ma’lum qildi. Mazkur ijodiy jamoa xalqlar o‘rtasidagi do‘stlikni mustahkamlash, milliy madaniyatlarni targ‘ib etish va mamlakat madaniy hayotini yanada boyitishga xizmat qilishi ta’kidlandi.
Tabrik yakunida Prezident Shavkat Mirziyoyev barcha yurtdoshlarni bayram bilan yana bir bor muborakbod etib, ularga sihat-salomatlik, oilaviy baxt, tinchlik-xotirjamlik va Vatan ravnaqi yo‘lidagi faoliyatida ulkan muvaffaqiyatlar tiladi.
