Sherobodda brakonyerlar qo‘riqxona xodimlariga o‘q uzdi
Huquqbuzarlar qo‘riqxona xodimlarining to‘xtash talabiga bo‘ysunmagan va voqea joyidan qochib ketgan.
Surxondaryo viloyatining Sherobod tumanida “Surxon” davlat qo‘riqxonasi hududida sodir etilgan noqonuniy ov holati yuzasidan uch nafar shaxsga nisbatan jinoyat ishi qo‘zg‘atildi. Bu haqda Ekologiya va iqlim o'zgarishi milliy qo'mitasi xabar berdi.
Ma’lum qilinishicha, qo‘riqxona xodimlari xizmat kuzatuvi davomida “Sherjon” bo‘limi hududida ov qurollari bilan yurgan uch nafar shaxsni aniqlagan.
Huquqbuzarlarga bir necha bor to‘xtash talabi qo‘yilgan. Biroq ular qonuniy talabga bo‘ysunmay, qo‘riqxona xodimlariga qarata o‘q uzgan hamda ryukzaklarini voqea joyida tashlab, qochib ketgan.
Voqea joyida qoldirilgan ryukzaklar ko‘zdan kechirilganda, ularning ichidan ikki bosh yovvoyi hayvonning bo‘laklangan go‘shti topilgan.
O‘tkazilgan tezkor-qidiruv va surishtiruv tadbirlari davomida gumonlanuvchilarning shaxsi aniqlanib, to‘plangan materiallar Sherobod tumani Ichki ishlar bo‘limiga taqdim etilgan.
Mazkur holat yuzasidan Jinoyat kodeksining 202-moddasi 3-qismi (hayvonot dunyosidan foydalanish qoidalarini buzish) bilan jinoyat ishi qo‘zg‘atildi.
Hozirda holat bo‘yicha dastlabki tergov harakatlari olib borilmoqda.
