Toshkentda yolg‘iz keksa ayolning uyi o‘zlashtirildimi?
Bosh prokuratura ijtimoiy tarmoqlarda tarqalgan holat yuzasidan munosabat bildirdi.
Toshkent shahrida yolg‘iz yashovchi keksa ayolning uy-joyi bilan bog‘liq holat yuzasidan jinoyat ishi qo‘zg‘atildi. Bu haqda Bosh prokuratura ma’lum qildi.
Qayd etilishicha, ijtimoiy tarmoqlarda Mirzo Ulug‘bek tumanida yashovchi yolg‘iz keksa ayol qarovsiz qoldirilgani aks etgan videolavha tarqalganidan so‘ng mazkur holat yuzasidan tuman prokuraturasi tomonidan tergovga qadar tekshiruv o‘tkazilgan.
Tekshiruv davomida 1940-yilda tug‘ilgan fuqaro L. Juravlyova Mirzo Ulug‘bek tumanidagi xonadonda yolg‘iz yashab kelgani hamda sog‘lig‘i bilan bog‘liq bir qator kasalliklar sababli dispanser hisobida turgani aniqlangan.
Shuningdek, unga tegishli xonadon 2025-yil 25-sentyabr kuni notarial tartibda rasmiylashtirilgan oldi-sotdi shartnomasi asosida boshqa shaxs nomiga o‘tkazilgani ma’lum bo‘lgan.
Prokuratura ma’lumotiga ko‘ra, uy-joy begonalashtirilgan vaqtda fuqaroning o‘z harakatlarining mazmunini anglash hamda ularni boshqarish qobiliyatiga ega bo‘lgan-bo‘lmaganini, shuningdek, uning firibgarlik jinoyati qurboni bo‘lgan bo‘lishi mumkinligini aniqlash zarurati yuzaga kelgan.
Shu munosabat bilan mazkur holat yuzasidan Jinoyat kodeksining 168-moddasi 4-qismi "a" bandi bilan jinoyat ishi qo‘zg‘atildi.
Hozirda ish bo‘yicha barcha holatlarni har tomonlama, to‘liq va xolisona o‘rganishga qaratilgan dastlabki tergov harakatlari olib borilmoqda.
