15 ta hududda elektr va gaz masalalari bo‘yicha maxsus shtablar tashkil etildi

 

Energetika vazirligi respublikaning 15 ta hududida elektr energiyasi va tabiiy gaz ta’minoti bilan bog‘liq muammolarni tizimli bartaraf etish hamda iste’molchilarga ko‘rsatilayotgan xizmatlar sifatini oshirish maqsadida maxsus shtablar tashkil etdi.

 

Vazirlik ma’lumotiga ko‘ra, mazkur shtablar joylardagi elektr va gaz ta’minoti holatini chuqur tahlil qilish, mavjud kamchiliklarni aniqlash, ularni tezkor bartaraf etish hamda aholidan kelayotgan murojaatlarni o‘z vaqtida hal etishga xizmat qiladi.

 

Har bir shtabga energetika tizimidagi yirik korxona va tashkilotlar rahbarlari shtab boshlig‘i sifatida biriktirilgan. Tegishli tuman hokimlari esa shtab rahbarining o‘rinbosari etib belgilangan.

 

Maxsus shtablar quyidagi hududlarda faoliyat yuritadi:

• Andijon tumani – Energetika vaziri maslahatchisi Dadajon Isakulov;

• Davlatobod tumani – “O‘zbekiston milliy elektr tarmoqlari” AJ raisi Abdumalik Nazirov;

• Denov tumani – “O‘zenergoinspeksiya” boshlig‘i o‘rinbosari Bexzod Sobirov;

• Farg‘ona tumani – “Hududgazta’minot” AJ raisi Marufxon Xodjayev;

• Koson tumani – “O‘zenergoinspeksiya” boshlig‘i o‘rinbosari Xurshidjon Eshqo‘ziyev;

• Mirzo Ulug‘bek tumani – Energetika vazirining birinchi o‘rinbosari Umid Mamadaminov;

• Qo‘shtepa tumani – “O‘zenergosotish” AJ raisi Jahongir Obidjonov;

• Sirdaryo tumani – “Issiqlik elektr stansiyalari” AJ raisi Bahodir Jo‘rayev;

• To‘rtko‘l tumani – “Issiqlik elektr stansiyalari” AJ raisining birinchi o‘rinbosari Ozod Axunov;

• Urganch tumani – “Hududiy elektr tarmoqlari” AJ raisining birinchi o‘rinbosari Bobur Islomov;

• Urgut tumani – “Hududiy elektr tarmoqlari” AJ raisi Sardor Isakulov;

• Xatirchi tumani – Energetika vaziri o‘rinbosari Umarjon Egamberdiyev;

• Yangiyo‘l tumani – Energetika vaziri Sherzod Xodjayev;

• G‘ijduvon tumani – “O‘ztransgaz” AJ raisi Askar Isakov;

• Sharof Rashidov tumani – “O‘zenergoinspeksiya” boshlig‘i Axad Isoqjonov.

 

Energetika vazirligi ushbu hududlarda yashovchi fuqarolarni elektr va gaz ta’minoti bilan bog‘liq muammo, murojaat yoki takliflari bo‘lsa, tuman hokimliklari huzurida tashkil etilgan maxsus shtablarga murojaat qilishga chaqirdi.

 

Qayd etilishicha, aynan ushbu hududlar elektr energiyasi va tabiiy gaz bo‘yicha qarzdorlik darajasining yuqoriligi, energiya yo‘qotishlarining ko‘pligi, tarmoqlarning eskirgani, shuningdek, aholidan kelib tushayotgan murojaatlar sonining yuqoriligi kabi mezonlar asosida tanlab olingan.