95 nafar olimning 157,2 mlrd so‘mlik ilmiy grant loyihalari moliyalashtirildi
Moliyalashtirilgan ilmiy loyihalar iqtisodiyot, sanoat, sog‘liqni saqlash va ekologiya sohalarini rivojlantirishga qaratilgan.
Innovatsion rivojlanish agentligida O‘zbekiston mustaqilligining 35 yilligi munosabati bilan davlat ilmiy dasturlari doirasida o‘tkazilgan tanlovlar g‘oliblarini taqdirlash marosimi bo‘lib o‘tdi. Unda umumiy qiymati 157,2 milliard so‘mlik 95 ta ilmiy loyiha mualliflariga grant sertifikatlari topshirildi.
Tadbirda Innovatsion rivojlanish agentligi direktorining vazifasini vaqtincha bajaruvchi A. Norov ishtirok etib, ilm-fan va innovatsiyalarni rivojlantirish borasida amalga oshirilayotgan islohotlar hamda ularning natijalari haqida so‘z yuritdi.
Qayd etilishicha, moliyalashtirilayotgan loyihalar iqtisodiyot va sanoatni rivojlantirish, aholi turmush sifatini yaxshilash, sog‘liqni saqlash, atrof-muhitni muhofaza qilish hamda O‘zbekistonning xalqaro ilmiy maydondagi nufuzini oshirishga qaratilgan.
Tadbirda ilm-fan, ta’lim, ishlab chiqarish va innovatsiyalar integratsiyasini kuchaytirish davlat siyosatining ustuvor yo‘nalishlaridan biri ekani ta’kidlandi. Shu bois grant asosida qo‘llab-quvvatlanayotgan loyihalar nafaqat ilmiy yangilik yaratishi, balki amaliy natija berishi, zamonaviy texnologiyalar va innovatsion yechimlar orqali mamlakat taraqqiyotiga xizmat qilishi zarurligi qayd etildi.
Grant sertifikatlarini topshirish marosimida Agentlik direktorining Ma’naviyat va davlat tili masalalari bo‘yicha maslahatchisi U. Tashkenbayev ham ishtirok etdi. So‘zga chiqqanlar davlat ilmiy dasturlari doirasidagi tanlovlar ilmiy salohiyatni qo‘llab-quvvatlash, istiqbolli ishlanmalarni amaliyotga joriy etish va o‘zbekistonlik olimlarning xalqaro maydondagi raqobatbardoshligini oshirishda muhim o‘rin tutayotganini ta’kidladi.
Tadbir davomida Umumiy va noorganik kimyo instituti vakili, "Olima ayol" tanlovi g‘olibi Dilnoza Jumayeva ham bugungi kunda ilm-fan sohasida yaratilayotgan imkoniyatlarni yuqori baholadi. Uning ta’kidlashicha, zamonaviy laboratoriyalar, grant dasturlari va yosh olimlarni qo‘llab-quvvatlash tizimi ilmiy izlanishlar samaradorligini oshirishga xizmat qilmoqda.
Taqdirlash marosimi grant g‘oliblariga kelgusi ilmiy faoliyatida muvaffaqiyatlar tilash bilan yakunlandi.
