Aholi foydalanadigan hududlar qurilish maydoniga aylantirilmasligi kerak — Saida Mirziyoyeva
Prezident Administratsiyasi rahbari poytaxtdagi jamoat hududlari, bolalar maydonchasi va yashil hududlar saqlanishi zarurligini ta’kidladi.
Prezident Administratsiyasi rahbari Saida Mirziyoyeva Toshkent shahrining Mirobod tumanidagi “Lolazor” mahallasida kuzatilgan holat yuzasidan munosabat bildirdi.
Qayd etilishicha, aholi foydalanishi uchun ajratilgan hududlar ofis yoki turar joy binolarini qurish uchun emas, balki o‘zining asl vazifasiga muvofiq jamoat manfaatlariga xizmat qilishi lozim.
Saida Mirziyoyevaning ta’kidlashicha, mahallaga tashrif davomida fuqarolar tomonidan ekilgan daraxtlar kesib tashlangani, bolalar maydonchasi o‘rnida esa biznes markazi qurilishi rejalashtirilayotgani aniqlangan. Mahalla aholisi esa bunday qurilishlar oqibatida umumiy hovlilar, bolalar o‘yin maydonchalari va sport inshootlari bosqichma-bosqich yo‘qolib borayotganidan xavotir bildirgan.
Shu munosabat bilan Bosh prokuraturaga Toshkent shahri bo‘yicha jamoat foydalanishidagi hududlar va shunga o‘xshash obyektlarni to‘liq inventarizatsiyadan o‘tkazish topshirildi.
Tekshiruvlar davomida qurilishlarga berilgan ruxsatnomalarning qonuniyligi, shaharsozlik me’yorlariga rioya etilgani hamda aholi manfaatlari qay darajada inobatga olingani o‘rganiladi.
Ta’kidlanishicha, qonunbuzarlik holatlari aniqlansa, mas’ul shaxslarga nisbatan qat’iy huquqiy choralar ko‘riladi. Zarurat tug‘ilganda aybdorlar jinoiy javobgarlikka, jumladan, ozodlikdan mahrum etish jazosi bilan ham javob berishi mumkin.
