Fransiyada o‘rmon yong‘inlari sabab 275 kishi hibsga olindi
Mamlakatda yuz bergan 10 ta yong‘indan 9 tasi inson omili sababli kelib chiqqan.
Fransiyada o‘rmon yong‘inlarini keltirib chiqarganlikda gumonlanayotgan 275 kishi qo‘lga olindi. Bu haqda mamlakat ichki ishlar vaziri Loran Nunez ma’lum qildi.
Uning bildirishicha, qo‘lga olinganlardan 31 nafariga nisbatan rasmiy ayblov e’lon qilingan. Vazirning ta’kidlashicha, Fransiyada yuz bergan 10 ta yong‘indan 9 tasi inson omili sababli kelib chiqqan.
Rasmiy ma’lumotlarga ko‘ra, 2026-yil boshidan buyon mamlakatda o‘rmon yong‘inlari 117 ming gektardan ortiq hududni kulga aylantirgan. Eng og‘ir vaziyat Fransiyaning Jirond departamentida kuzatilmoqda. Bu yerda yong‘inlar qariyb 42 ming gektar o‘rmonni qamrab olib, 200 mingdan ortiq aholi evakuatsiya qilingan.
Shuningdek, poytaxt yaqinidagi mashhur Fontenblo (Fontainebleau) o‘rmonida ham yana bir yong‘in sodir bo‘lib, u 6 gektar maydonni qamrab olgan. Yong‘inni o‘chirish ishlariga yuzga yaqin o‘t o‘chiruvchi jalb etilgan.
Issiq ob-havo va qurg‘oqchilik tufayli Fransiyaning 21 ta departamentida to‘q sariq darajadagi ob-havo xavfi e’lon qilingan. Rasmiylar fuqarolarni yong‘in xavfsizligi qoidalariga qat’iy rioya qilishga chaqirmoqda.
