Hamas to‘liq qurolsizlanishga rozi bo‘ldi — Tramp

 

AQSh prezidenti Donald Tramp G‘azodagi Hamas harakatini to‘liq qurolsizlantirish bo‘yicha “tarixiy kelishuv”ga erishilganini ma’lum qildi. Uning ta’kidlashicha, mazkur kelishuv uzoq muddatli tinchlik va xavfsizlikni ta’minlash yo‘lidagi muhim qadam hisoblanadi.

 

Trampning Truth Social platformasida yozishicha, kelishuv nafaqat Hamas, balki G‘azodagi boshqa qurolli guruhlarning ham qurolsizlanishini nazarda tutadi. Shuningdek, hujjatga ko‘ra, G‘azo sektori yangi Falastin ma’muriyati tomonidan boshqarilishi, Isroil esa xavfsizlik kafolatlariga ega bo‘lishi ko‘zda tutilgan.

 

AQSh prezidenti qurolsizlanish jarayoni davomida Isroil qo‘shinlari bosqichma-bosqich hududni tark etishini, xavfsizlikni esa xalqaro barqarorlashtirish kuchlari va yangi Falastin politsiyasi birgalikda ta’minlashini bildirdi.

 

Tramp vositachilik qilgan Misr, Qatar va Turkiyaga minnatdorlik bildirib, “7-oktabr voqealari kabi tahdidlar qayta takrorlanmasligi kerak”ligini ta’kidlagan.

 

Biroq, Hamas hozircha AQSh prezidentining bayonotini rasman tasdiqlamagan. Al Jazeera telekanali harakat hali rasmiy izoh bermaganini, Axios nashri esa Oq uy yaqin kunlarda tegishli bitim imzolanishini kutayotganini xabar qilgan.