Namanganda yashirin omborxonadan 28 mingdan ortiq sertifikatsiz dori vositasi aniqlandi
Ularning qiymati 1,4 milliard so‘mga baholanmoqda.
Davlat xavfsizlik xizmati, Bojxona qo‘mitasi hamda Ichki ishlar organlari xodimlari hamkorligida o‘tkazilgan tezkor tadbir davomida Namangan shahrida yirik noqonuniy dori vositalari ombori fosh etildi. Bu haqda DXX xabar berdi.
Tezkor tadbirda Namangan shahrida yashovchi 2003-yilda tug‘ilgan fuqaroning yashash manzili ko‘zdan kechirilgan. Natijada xonadonda tashkil etilgan yashirin omborxonadan xorijda ishlab chiqarilgan, tegishli sifat sertifikatiga ega bo‘lmagan 28 turdagi 28 928 dona dori vositasi aniqlanib, protsessual tartibda rasmiylashtirib olingan.
Musodara qilingan dori vositalari orasida “Ortofen”, “Neyroks”, “Tirozol”, “Siofor” va boshqa turdagi preparatlar mavjud.
Dastlabki hisob-kitoblarga ko‘ra, mamlakat hududiga noqonuniy yo‘llar bilan olib kirilgan ushbu dori vositalarining umumiy qiymati 1 milliard 400 million so‘mni tashkil etadi.
Hozirda mazkur dori vositalari yuzasidan ekspertiza tayinlangan bo‘lib, holat bo‘yicha surishtiruv ishlari davom ettirilmoqda.
