O‘zbekistonga salqin havo kirib kelmoqda
Dam olish kunlaridan boshlab havo harorati bosqichma-bosqich pasaya boshlaydi.
Dam olish kunlaridan boshlab O‘zbekistonda havo harorati bosqichma-bosqich pasayishi kutilmoqda. Bu haqda “O‘zgidromet” xabar berdi.
Ma’lumotga ko‘ra, 31-iyul kuni respublika hududida issiq ob-havo saqlanib qoladi. Kunduzi havo harorati 38–41 daraja, shimoliy, janubiy va cho‘l hududlarda esa 42–43 darajagacha ko‘tariladi. Bu ko‘rsatkich iyul oxiri va avgust boshidagi iqlimiy me’yordan 2–4 darajaga yuqori bo‘ladi.
1–2-avgust kunlari issiq ob-havo respublikaning aksariyat hududlarida davom etadi. Faqat shimoli-g‘arbiy viloyatlarda haroratning pasayishi boshlanadi. Ushbu kunlarda asosan kam bulutli ob-havo kuzatiladi, yog‘ingarchilik kutilmaydi.
Prognozlarga ko‘ra, kelasi haftadan salqin havo oqimi respublikaning barcha hududlarini qamrab olib, harorat bosqichma-bosqich pasayadi.
Shuningdek, ayrim hududlarda shamol tezligi 13–18 metr/sekundgacha kuchayishi, ayrim joylarda esa chang-to‘zonlar kuzatilishi mumkin.
Toshkent shahrida ham 31-iyul – 2-avgust kunlari yog‘ingarchilik kutilmaydi. Kunduzi havo harorati 37–40 daraja, kechasi esa 23–26 daraja atrofida bo‘ladi.
“O‘zgidromet” prognoziga ko‘ra, avgust oyining boshidan respublika hududiga nisbatan salqin havo massasi kirib kelishi natijasida kunduzgi harorat 25–30 darajagacha pasayishi kutilmoqda.
