Pokistondagi ko‘mir koni qulab, 34 kishi halok bo‘ldi
Dastlabki ma’lumotlarga ko‘ra, avariyaga metan gazining portlashi sabab bo‘lgan.
Pokistonning Balujiston viloyatida joylashgan ko‘mir konida yuz bergan qulash oqibatida halok bo‘lganlar soni 34 nafarga yetdi. Bu haqda mamlakatning tabiiy ofatlarni boshqarish idorasiga tayanib Geo TV telekanali xabar berdi.
Ma’lumotlarga ko‘ra, hodisa sodir bo‘lgan vaqtda kon ichida 42 nafar ishchi bo‘lgan. Dastlabki taxminlarga ko‘ra, avariyaga metan gazining portlashi sabab bo‘lgan. Portlash ortidan yer osti inshootlari qulab tushib, konchilar vayronalar ostida qolgan.
Qutqaruv xizmatlari hodisa joyida qidiruv-qutqaruv ishlarini davom ettirmoqda. So‘nggi qidiruv ishlari davomida yana olti nafar konchining jasadi topilgan va qurbonlar soni 34 nafarga yetgan.
Mutaxassislar hodisaning aniq sabablarini o‘rganmoqda. Vayronalar ostida boshqa ishchilar qolgan-qolmagani yuzasidan ham tekshiruv va qidiruv ishlari davom etmoqda.
Mahalliy politsiya ma’lumotiga ko‘ra, o'sha kuni Balujiston viloyatidagi yana bir ko‘mir konida ham baxtsiz hodisa yuz berib, bir nafar konchi halok bo‘lgan.
Qayd etilishicha, Balujiston va Sind viloyatlaridagi ko‘mir konlarida xavfsizlik talablariga to‘liq rioya etilmasligi hamda og‘ir mehnat sharoitlari sabab bunday avariyalar tez-tez kuzatiladi.
