Qoraqalpog‘istonda fermerlar uchun maxsus akselerator dasturi yo‘lga qo‘yiladi

 

Qoraqalpog‘istonda fermerlar va agro-tadbirkorlarning bilim va ko‘nikmalarini rivojlantirish, qishloq xo‘jaligi mahsulotlarini tijoratlashtirish hamda yangi bozor imkoniyatlarini kengaytirishga qaratilgan maxsus akselerator dasturi ishga tushiriladi.

 

Mazkur tashabbus Abu-Dabi taraqqiyot jamg‘armasi (ADFD) tomonidan moliyalashtirilayotgan “Qoraqalpog‘istonning degradatsiyaga uchragan hududlarida barqaror qishloq xo‘jaligi ishlab chiqarish tizimlarini rivojlantirish” loyihasi doirasida amalga oshirilmoqda.

 

Dastur Birlashgan Arab Amirliklarining Sho‘rlangan tuproq sharoitida biodehqonchilik xalqaro markazi (ICBA) hamda O‘zbekiston Respublikasi Innovatsion rivojlanish agentligi hamkorligida tashkil etilgan.

 

O‘quv mashg‘ulotlari 3-avgustdan Nukus Yoshlar texnoparkida boshlanib, bir oy davom etadi. Ishtirokchilar yuqori qo‘shilgan qiymatga ega mahsulotlar yaratish, zamonaviy biznes yuritish, mahsulotlarni tijoratlashtirish va yangi bozorlarga chiqish bo‘yicha amaliy bilim hamda ko‘nikmalarga ega bo‘ladi.

 

Loyiha doirasida Qoraqalpog‘istondan 200 nafar fermer va agro-tadbirkorni qamrab olish rejalashtirilgan.

 

ICBA direktori Tarifa Alzaabining ta’kidlashicha, dastur avvalgi loyihalar davomida to‘plangan tajriba asosida ishlab chiqilgan bo‘lib, fermerlarni qo‘llab-quvvatlashni yangi bosqichga olib chiqishga xizmat qiladi.

 

Shuningdek, dasturda mahsulotni yetishtirishdan tortib uni qayta ishlash, bozorga chiqarish va iste’molchigacha yetkazishni nazarda tutuvchi “Farm to Fork” yondashuvi asosida qiymat zanjirini rivojlantirishga alohida e’tibor qaratiladi.

 

Mutaxassislar Qoraqalpog‘iston sharoitida sho‘rlanish va qurg‘oqchilikka chidamli ekinlarni joriy etish qishloq xo‘jaligi samaradorligini oshirish, suv resurslaridan oqilona foydalanish hamda hududning ekologik barqarorligini ta’minlashda muhim ahamiyat kasb etishini qayd etmoqda.

 

Tashkilotchilar mazkur akselerator dasturi hududda innovatsion va barqaror qishloq xo‘jaligini rivojlantirish, fermerlar va agro-tadbirkorlarning raqobatbardoshligini oshirish hamda ularning mahsulotlarini yangi bozorlarga olib chiqishga xizmat qilishini ta’kidlamoqda.