Rossiyada benzin eksportiga qo‘yilgan taqiq yana uzaytirildi
Gumanitar yordam maqsadida xorijiy davlatlarga yoqilg‘i eksporti xalqaro hukumatlararo kelishuvlar asosida amalga oshiriladi.
Rossiya hukumati ichki yoqilg‘i bozorida barqarorlikni saqlash maqsadida benzin eksportiga qo‘yilgan vaqtinchalik taqiq muddatini yana olti oyga uzaytirdi.
Hukumat qaroriga ko‘ra, 2027-yil 1-avgustdan 31-yanvargacha benzin, dizel yoqilg‘isi, dengiz yoqilg‘isi va gaz moyi eksportiga nisbatan vaqtinchalik cheklovlar amal qiladi.
Shu bilan birga, 1-sentabrdan boshlab cheklovlar Rossiyadagi ishlab chiqaruvchilar tomonidan eksport qilinadigan dizel yoqilg‘isi, dengiz yoqilg‘isi va gaz moyiga tatbiq etilmaydi. Shuningdek, xalqaro hukumatlararo kelishuvlar asosida xorijiy davlatlarga gumanitar yordam ko‘rsatish uchun yoqilg‘i eksportiga ruxsat beriladi.
Hukumat qishloq xo‘jaligi ishlab chiqaruvchilarini yoqilg‘i bilan uzluksiz ta’minlash maqsadida 1-noyabrgacha Energetika vazirligi, Qishloq xo‘jaligi vazirligi, hududiy hokimliklar va neft kompaniyalari o‘rtasida maxsus ta’minot tartibini ham joriy etdi.
Bundan tashqari, davlat va munitsipal muassasalar uchun motor yoqilg‘isini xarid qilish bo‘yicha maxsus narx belgilash qoidalari 2026-yil oxirigacha to‘xtatildi. Bu yoqilg‘i xaridlarini umumiy tartib asosida amalga oshirish hamda birja narxlaridagi o‘zgarishlar sabab ta’minot uzilishlarining oldini olishga xizmat qiladi.
Rossiya hukumati mazkur choralar ichki bozorda yoqilg‘i ta’minotini barqarorlashtirish va narxlar keskin oshib ketishining oldini olishga qaratilganini ta’kidladi.
