Samarqandda pulga muhtoj ayollarni chet elga yuborayotgan 21 yoshli qiz ushlandi
U bir ayolni Rossiyaga jo‘natishga uringan vaqtida ashyoviy dalillar bilan ushlangan.
Samarqand xalqaro aeroportida odam savdosi bilan bog‘liq jinoyatda gumon qilinayotgan qiz qo‘lga olindi. Bu haqda Navoiy viloyati Ichki ishlar boshqarmasi ma’lum qildi.
Qayd etilishicha, "Xavfsiz va sog‘lom yurt" keng qamrovli tezkor-profilaktik tadbirlari davomida 2005-yilda tug‘ilgan Jizzax viloyati fuqarosi pulga muhtoj ayollarni aldov yo‘li bilan chet davlatlarga fohishalik maqsadida yuborishga uringan.
Tezkor tadbir davomida u Xatirchi tumanida yashovchi ayolni Rossiyaga jo‘natish uchun yo‘l xarajatlarini o‘z zimmasiga olib, uni kuzatayotgan vaqtida Samarqand xalqaro aeroportida qo‘lga olingan. Holat yuzasidan olingan aviachiptalar protsessual tartibda ashyoviy dalil sifatida rasmiylashtirilgan.
Mazkur holat yuzasidan gumonlanuvchiga nisbatan O‘zbekiston Respublikasi Jinoyat kodeksining 135-moddasi ikkinchi qismi (odam savdosi) bilan jinoyat ishi qo‘zg‘atilib, tergov harakatlari olib borilmoqda.
