Toshkentda 3-avgustgacha ayrim yo‘llar yopiladi
Mustaqillik shoh ko‘chasining ikkinchi qismida asfalt yotqizish ishlari yakunlanadi.
Toshkent shahridagi Mustaqillik shoh ko‘chasining ikkinchi bosqichida asfalt yotqizish ishlarini yakunlash munosabati bilan ayrim yo‘llarda transport harakati vaqtincha cheklanadi.
2026-yil 31-iyul soat 23:00 dan 3-avgust soat 22:00 ga qadar quyidagi uchastkalarda barcha turdagi transport vositalari harakati to‘xtatiladi:
- Oqqo‘rg‘on ko‘chasi — Mustaqillik shoh ko‘chasi kesishmasidan Osiyo ko‘chasi kesishmasigacha;
- Parkent ko‘chasi — Mustaqillik shoh ko‘chasi kesishmasidan Parkent-2 ko‘chasi kesishmasigacha.
Qayd etilishicha, cheklovlar asfalt yotqizish ishlarini sifatli va xavfsiz yakunlash, yo‘l infratuzilmasini bosqichma-bosqich takomillashtirish hamda transport harakati xavfsizligini ta’minlash maqsadida joriy etilgan.
Mutasaddilar haydovchilardan yuzaga kelishi mumkin bo‘lgan noqulayliklar uchun uzr so‘rab, harakat yo‘nalishlarini oldindan rejalashtirishni tavsiya qildi.
