Toshkentda mansabdorlar qariyb 20 mlrd so‘mlik budjet mablag‘larini talon-toroj qildi
"Hududgazta’minot" va "Texnopark" mansabdorlariga nisbatan jinoyat ishi qo‘zg‘atildi.
Bosh prokuratura huzuridagi Iqtisodiy jinoyatlarga qarshi kurashish departamenti tomonidan o‘tkazilgan tergovga qadar tekshiruv davomida "Hududgazta’minot" AJ va "Texnopark" MChJ mansabdor shaxslari ishtirokida 19,9 milliard so‘mlik budjet mablag‘larini talon-toroj qilish holati aniqlangani ma’lum qilindi.
Dastlabki ma’lumotlarga ko‘ra, mas’ul shaxslar o‘zaro til biriktirib, go‘yoki elektron gaz hisoblagichlariga texnik xizmat ko‘rsatish ishlari amalga oshirilganini rasmiylashtirish orqali 19 milliard so‘m budjet mablag‘larini o‘zlashtirish yoki rastrata qilish yo‘li bilan talon-toroj qilganlikda gumon qilinmoqda.
Tekshiruv davomida yana bir qonunbuzarlik holati ham aniqlangan. Xususan, "Texnopark" MChJ tomonidan ishlab chiqarilgan va "Hududgazta’minot" AJ tomonidan iste’molchilarga o‘rnatilgan 273 dona gaz hisoblagichining ko‘rsatkichlari amaldagidan kam hisoblagani aniqlangan.
Mazkur holat oqibatida davlat va jamiyat manfaatlariga 861,1 million so‘m miqdorida zarar yetkazilgani qayd etildi.
Hozirda ushbu holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan bo‘lib, barcha holatlarni aniqlashga qaratilgan tergov harakatlari olib borilmoqda.
