Markaziy Osiyo va Ozarbayjon yagona taraqqiyot makonini shakllantirishi zarur — Shavkat Mirziyoyev
Oʻzbekiston Prezident Markaziy Osiyo mamlakatlari va Ozarbayjonning mintaqaviy hamkorligini rivojlantirish istiqbollarini belgilab berdi
Mirzo Ulug‘bek tumanida yolg‘iz yashovchi keksa ayolning holati yuzasidan o‘tkazilgan xizmat tekshiruvi yakunlariga ko‘ra, unga o‘z vaqtida zarur yordam ko‘rsatmagan mas’ullar lavozimidan ozod etildi.
Ijtimoiy himoya milliy agentligi ma’lum qilishicha, ijtimoiy tarmoqlarda Mirzo Ulug‘bek tumani “Habib Abdullayev” mahallasida yashovchi fuqaro L. Juravlyovaning yashash sharoiti aks etgan videomurojaat yuzasidan holat nazoratga olinib, joyida o‘rganish ishlari olib borilgan.
Aniqlanishicha, fuqaro 2026-yil 11-iyundan boshlab uy sharoitida ijtimoiy-maishiy xizmat olish uchun vaucher bilan ta’minlangan va haftasiga to‘rt marotaba xizmat ko‘rsatib kelingan. Shu bilan birga, tibbiy xulosaga ko‘ra, u kognitiv buzilishlar, tomirli demensiya, 2–3-darajali distsirkulyator ensefalopatiya hamda tarqoq osteoxondroz kasalliklaridan aziyat chekayotgani tasdiqlangan.
Qo‘shimcha tekshiruvlar davomida fuqaro mustaqil ravishda ovqatlana olmasligi, kundalik ehtiyojlarini o‘zi qondira olmasligi, shuningdek, yolg‘iz qolganida o‘ziga va atrofdagilarga xavf tug‘dirishi mumkinligi aniqlangan.
Shundan so‘ng fuqaro doimiy parvarishga muhtoj deb topilib, Ijtimoiy qo‘llab-quvvatlash markaziga joylashtirilgan. Hozirda unga 24 soatlik tibbiy va ijtimoiy parvarish xizmati ko‘rsatilmoqda.
Xizmat tekshiruvi yakunida tuman “Inson” ijtimoiy xizmatlar markazi hamda tuman tibbiyot birlashmasi mas’ul xodimlari fuqaroning sog‘lig‘i og‘irlashayotganini o‘z vaqtida aniqlamagani va doimiy parvarish zaruratini belgilamaganligi sababli egallab turgan lavozimidan ozod etildi.
