“Xorazm guruchi” geografik ko‘rsatkich sifatida davlat ro‘yxatidan o‘tkazildi
Yangi maqom mahsulot nomining huquqiy himoyasini ta’minlab, undan noqonuniy foydalanishning oldini olishga xizmat qiladi.
Adliya vazirligida “Xorazm guruchi” geografik ko‘rsatkich sifatida davlat ro‘yxatidan o‘tkazildi. Mazkur qaror mahsulot nomining huquqiy himoyasini ta’minlash, uning kelib chiqishi va sifatini kafolatlash hamda milliy brend sifatida rivojlantirishga xizmat qiladi.
Vazirlik ma’lumotiga ko‘ra, Xorazm vohasida yetishtiriladigan guruch o‘zining yuqori sifati, xushbo‘yligi va o‘ziga xos pishirish xususiyatlari bilan ajralib turadi. Mahsulotning bunday sifat ko‘rsatkichlari Amudaryo suvlari, unumdor tuproq, hududning qulay iqlimi hamda avloddan-avlodga o‘tib kelayotgan an’anaviy dehqonchilik tajribasi bilan chambarchas bog‘liq.
“Xorazm guruchi”ning geografik ko‘rsatkich sifatida davlat reyestriga kiritilishi mahsulot nomidan noqonuniy foydalanishning oldini oladi, uning kelib chiqishi va sifatini huquqiy jihatdan himoya qiladi hamda iste’molchilarga mahsulotning haqiqiyligi bo‘yicha kafolat yaratadi.
Shuningdek, mazkur maqom Xorazm viloyatining qishloq xo‘jaligi salohiyatini yanada oshirish, milliy brendni rivojlantirish va mahsulotni ichki hamda xalqaro bozorlarda keng targ‘ib etish uchun muhim ahamiyat kasb etadi.
Ma’lumot uchun, geografik ko‘rsatkich — mahsulotning muayyan hududga mansubligini tasdiqlovchi intellektual mulk obyekti bo‘lib, uning sifati, obro‘si va o‘ziga xos xususiyatlari aynan shu hududning tabiiy-iqlimiy hamda ijtimoiy-madaniy omillari bilan bog‘liq ekanini anglatadi.
