Yo‘l haqini to‘lamagan yo‘lovchilardan qariyb 2 mlrd so‘m jarima undirildi
Joriy yil boshidan buyon Toshkent avtobuslarida chiptasiz yurgan 79 618 nafar yo‘lovchiga nisbatan ma’muriy bayonnoma rasmiylashtirildi.
2026-yil boshidan buyon Toshkent shahri avtobuslarida 79 618 nafar chiptasiz yo‘lovchiga nisbatan ma’muriy bayonnoma rasmiylashtirilib, ularga jami qariyb 2 milliard so‘m miqdorida jarima qo‘llanilgan.
“Toshkent shahar yo‘lovchi tashishni monitoring va nazorat qilish” davlat muassasasi ma’lumotiga ko‘ra, jamoat transportida to‘lov intizomini ta’minlash maqsadida muntazam nazorat-reyd tadbirlari o‘tkazilmoqda.
Aniqlangan huquqbuzarliklar bo‘yicha Ma’muriy javobgarlik to‘g‘risidagi kodeksining 144-moddasi 5-qismi asosida ma’muriy bayonnomalar rasmiylashtirilgan. Har bir qoidabuzarga bazaviy hisoblash miqdorining o‘ndan bir qismi — 41 ming 200 so‘m miqdorida jarima belgilangan.
Mutasaddilar ta’kidlashicha, jamoat transporti tizimining barqaror ishlashi yo‘lkira tushumlariga bevosita bog‘liq.
