450 nafardan ortiq xodim Toshkentda energiya xavfsizligini ta’minlashga jalb etildi
Energiya resurslaridan noqonuniy foydalanish holatlariga qarshi “Energetika xavfsizligi oyligi” boshlandi.
Toshkent shahrida energiya resurslaridan noqonuniy foydalanish va ularni behuda sarflash holatlarining oldini olishga qaratilgan «Energetika xavfsizligi oyligi» boshlandi.
Mazkur tadbirlar doirasida 450 nafardan ortiq xodimdan iborat kuchaytirilgan ishchi guruhlar faoliyat boshladi.
31-iyul kuni Yunusobod tumanida o‘tkazilgan yo‘riqnomada Toshkent shahar prokurori, Ichki ishlar bosh boshqarmasi boshlig‘i hamda shahar hokimi o‘rinbosari tomonidan mas’ullarga ustuvor vazifalar belgilab berildi.
Xususan, Prezident qaroriga muvofiq energiya samaradorligini oshirish, elektr va tabiiy gazdan noqonuniy foydalanish holatlarining oldini olish, yirik talon-toroj holatlarini aniqlash hamda resurslar yo‘qotilishi yuqori bo‘lgan hududlarda nazorat tadbirlarini kuchaytirish rejalashtirilgan.
Shuningdek, elektron monitoring tizimlari orqali hisoblagichiga tashqi ta’sir o‘tkazilgani yoki aloqaga chiqmayotgani aniqlangan iste’molchilar manzilli ravishda o‘rganiladi.
Mutasaddilarga ko‘ra, mazkur tadbirlar energiya resurslari talon-toroj qilinishining oldini olish hamda halol iste’molchilarni elektr va tabiiy gaz bilan barqaror ta’minlashga xizmat qiladi.
