Andijonda 21 nafar bolani bog‘chaga olib ketayotgan Tracker YTHga uchradi, bir bola halok bo‘ldi
Hodisada 8 nafar bola jarohatlangan, og‘ir ahvolda shifoxonaga yotqizilgan 6 yoshli qizaloq to‘rt kun o‘tib vafot etgan.
Andijon viloyatining Xo‘jaobod tumanida 21 nafar bolani xususiy bog‘chaga olib ketayotgan Tracker avtomobili yo‘l-transport hodisasiga uchrashi oqibatida 6 yoshli qizaloq vafot etgani ma’lum bo‘ldi.
Sud hujjatlariga ko‘ra, hodisa joriy yil 21-fevral kuni ertalab "Xo‘jaobod–Bobur" avtomobil yo‘lida sodir bo‘lgan. 40 yoshli ayol boshqaruvidagi Tracker avtomobilida 21 nafar bola xususiy bog‘chaga olib ketilayotgan vaqtda haydovchi transport vositasi boshqaruvini yo‘qotib, yo‘l chetidagi beton ustunga urilgan.
Yo‘l-transport hodisasi oqibatida 8 nafar bola turli darajadagi tan jarohatlari olgan. Ular orasida og‘ir ahvolda shifoxonaga yotqizilgan 6 yoshli qizaloq ko‘rsatilgan tibbiy yordamga qaramay, to‘rt kun o‘tib vafot etgan.
Sud jarayonida haydovchi avtomobilga 21 nafar bolani, jumladan, yukxona (bagaj) qismiga ham joylashtirganini tan olgan. Uning aytishicha, chap tomondan yuqori tezlikda harakatlangan avtomobilni ko‘rib cho‘chib ketgani sabab boshqaruvni yo‘qotgan va mashina beton ustunga borib urilgan. Ayol 2-guruh nogironi ekanini bildirib, suddan yengillik so‘ragan.
Mazkur holat yuzasidan ayol Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish oqibatida odam o‘limiga sabab bo‘lish) bilan aybdor deb topilgan.
Sud hukmiga ko‘ra, unga 2 yil muddatga transport vositalarini boshqarish huquqidan mahrum qilish hamda 3 yil muddatga ozodlikni cheklash jazosi tayinlangan.
