Erdog'anga suiqasd uyushtirishni rejalashtirgan shaxs qo'lga olindi

Turkiyada 2016-yilgi davlat to‘ntarishiga urinish vaqtida Prezident Rajab Toyyib Erdog‘anga suiqasd uyushtirishni rejalashtirganlikda gumon qilinayotgan shaxs qo‘lga olindi.

 

Turkiya Ichki ishlar vazirligi ma’lumotiga ko‘ra, mamlakat razvedka va xavfsizlik xizmatlari tomonidan o‘tkazilgan maxsus operatsiya davomida 10 yildan buyon qidiruvda bo‘lgan Burkay Karatepe Afyonkarahisar viloyatida qo‘lga olingan.

 

Rasmiylarga ko‘ra, u Turkiyada terrorchilik tashkiloti deb e’lon qilingan FETO bilan aloqador bo‘lib, 2016-yil 15-iyul kuni Marmaris shahrida Prezident Rajab Toyyib Erdo‘g‘anga suiqasd uyushtirishni rejalashtirgan guruh tarkibida bo‘lgan. Mahalliy OAV xabarlariga ko‘ra, u vertolyot uchuvchisi sifatida faoliyat yuritgan.

 

TRT Haber telekanali ma’lumotiga ko‘ra, mazkur ish doirasida ilgari suiqasdni rejalashtirishda gumon qilingan 36 nafar sobiq harbiy xizmatchi qo‘lga olingan. Burkay Karatepening ushlanishi bilan ushbu guruhning qidiruvda qolgan so‘nggi a’zosi ham hibsga olingani aytilmoqda.

 

Turkiya OAVning avvalgi xabarlariga ko‘ra, suiqasd rejasi Marmarisdagi mehmonxonada amalga oshirilishi ko‘zlangan, biroq Prezident Erdo‘g‘anning mehmonxonani rejalashtirilganidan oldin tark etgani sababli urinish muvaffaqiyatsiz yakunlangan.

 

Eslatib o‘tamiz, 2016-yil 15-iyuldagi davlat to‘ntarishiga urinish oqibatida 253 kishi halok bo‘lgan, 2 200 dan ortiq kishi jarohatlangan. To‘ntarish bostirilgach, Turkiyada keng ko‘lamli tergov ishlari olib borilib, minglab shaxslar javobgarlikka tortilgan hamda yuzlab gumondorlar umrbod ozodlikdan mahrum etilgan.