Farg‘onada “Inson” ijtimoiy xizmatlar markazi xodimi baxtsiz hodisa oqibatida halok bo‘ldi
Hududni tozalash ishlari vaqtida o‘t o‘rish qurilmasining tig‘i uzilib chiqib, xodimning yuragiga sanchilgan.
Farg‘ona viloyatining Uchko‘prik tumanida obodonlashtirish ishlari vaqtida “Inson” ijtimoiy xizmatlar markazi xodimi baxtsiz hodisa oqibatida halok bo‘ldi.
Ma’lum qilinishicha, hodisa 2026-yil 29-iyul kuni Uchko‘prik tumanining Qo‘qonboy hududida sodir bo‘lgan.
Dastlabki ma’lumotlarga ko‘ra, tuman “Inson” ijtimoiy xizmatlar markazi xodimlari hududni obodonlashtirish va tozalash ishlariga jalb qilingan. Ish jarayonida 34 yoshli markaz xodimi Tohirjon Jo‘rayev o‘t o‘rish qurilmasidan foydalanayotgan vaqtda qurilmaning o‘tkir metall tig‘i uzilib chiqib, uning ko‘krak qismiga sanchilgan.
Olingan og‘ir tan jarohati oqibatida xodim voqea joyida vafot etgan.
Kun.uz xabariga ko‘ra, mazkur hodisa nashrning bir-biridan mustaqil ikki manbasi voqea sodir bo‘lganini tasdiqlagan.
Shuningdek, hodisadan so‘ng Ijtimoiy himoya milliy agentligi direktori Mansur Olloyorov voqea joyiga borib, marhumning oila a’zolari bilan uchrashgan.
Nashr suhbatlashgan manbalardan birining ta’kidlashicha, “Inson” ijtimoiy xizmatlar markazi xodimlarining mahallalarni obodonlashtirish ishlari ularning xizmat vazifalariga kirmaydi. Manba davlat budjeti tashkilotlari xodimlarini bunday ishlarga jalb etish amaliyoti bekor qilinishi lozimligini qayd etgan.
