FIFA 4,2 milliard dollarlik xususiylashtirish rejasidan voz kechdi
Infantino FIFAning tijorat huquqlarining bir qismini sotish rejasidan voz kechish to'g'risidagi qarorini tasdiqladi.
FIFA Jahon chempionatlarini tashkil etish bilan shug‘ullanuvchi yangi kompaniya ulushining bir qismini xususiy investorlarga sotish orqali 4,2 milliard dollar jalb etish rejasidan voz kechdi. Bu haqda BBC xabar berdi.
Ma'lum qilinishicha, FIFA prezidenti Janni Infantino tashkilotning tijorat faoliyatini yurituvchi yangi kompaniyasining 20 foizlik ulushini xususiy investorlarga sotishni taklif qilgan. Ushbu loyiha orqali FIFA biznesi 20 milliard dollarga baholanib, 4,2 milliard dollar investitsiya jalb etilishi ko‘zda tutilgan edi.
Biroq mazkur tashabbus UEFA, Osiyo futbol konfederatsiyasi hamda Shimoliy va Markaziy Amerika futbol konfederatsiyasi tomonidan keskin tanqid qilingan. Ular Jahon chempionatlari kabi nufuzli musobaqalarning tijorat manfaatlari yo‘lida xususiy investorlar ishtirokiga berilishiga qarshi chiqqan.
Janni Infantino barcha tomonlarning fikrlarini o‘rganib chiqqach, loyiha futbol hamjamiyatida jiddiy kelishmovchiliklarni keltirib chiqargani sabab uni amalga oshirmaslikka qaror qilganini bildirgan.
Shuningdek, loyiha fonida FIFA prezidentining katta maslahatchisi Karlos Kordeyro iste'foga chiqqan. U mazkur tashabbus futbol manfaatlariga mos kelmasligini ta'kidlagan.
