Gaz ballonlari kechikishi yuzasidan tekshiruv boshlanadi
Energetika vazirligi suyultirilgan gaz ta’minoti bo‘yicha murojaatlarni nazoratga oldi.
Energetika vazirligi suyultirilgan gaz ta’minoti bilan bog‘liq murojaatlar va ijtimoiy tarmoqlarda tarqalgan shikoyatlar nazoratga olinganini ma’lum qildi.
Qayd etilishicha, internetda Farg‘ona viloyatining Quva tumanida aholiga suyultirilgan gaz ballonlari qariyb 100 kundan buyon yetkazib berilmayotgani haqida tarqalgan xabarlar yuzasidan o‘rganish ishlari olib boriladi.
Shuningdek, suyultirilgan gaz ballonlarini yetkazib berishdagi kechikishlar, ularni o‘z vaqtida to‘ldirish jarayoni hamda iste’molchilarga ko‘rsatilayotgan xizmat sifati tahlil qilinadi.
Bundan tashqari, gaz ballonlarini tarqatuvchi xodimlarning muomala madaniyati bilan bog‘liq holatlar ham o‘rganilib, aniqlangan kamchiliklarni bartaraf etish bo‘yicha tegishli choralar ko‘rilishi bildirildi.
Vazirlik ma’lumotiga ko‘ra, so‘nggi oylarda respublika hududlarida suyultirilgan gaz ta’minotida kuzatilayotgan muammolarni bosqichma-bosqich bartaraf etish ishlari davom etmoqda.
Hozirda O‘zbekistonda 3,7 million xonadon suyultirilgan gazdan foydalanadi. Tizim raqamlashtirilganiga qaramay, gaz ballonlarini o‘z vaqtida yetkazib berish bilan bog‘liq muammolar to‘liq bartaraf etilmagani qayd etildi.
