“Mahallada obodlik va mehr-saxovat oyligi”: mas’ullarga aniq vazifalar yuklatildi
Toshkentda mahallalarni obod qilish bo‘yicha 1 200 ga yaqin mas’ul ishtirokida yig‘ilish bo‘lib o‘tdi.
Toshkent shahrida “Mahallada obodlik va mehr-saxovat oyligi” doirasida kengaytirilgan yig‘ilish o‘tkazilib, mahallalarni obod qilish, kuz-qish mavsumiga tayyorgarlik hamda aholi bandligini ta’minlash bo‘yicha ustuvor vazifalar belgilandi.
Shayxontohur tumanidagi Alisher Navoiy kinosaroyida bo‘lib o‘tgan tadbirda Prezident Administratsiyasi vakillari, Toshkent shahar prokuraturasi, Ichki ishlar bosh boshqarmasi, Milliy gvardiya, kommunal xizmatlar, Boshqaruv servis kompaniyalari, “Mahalla” uyushmasi mutasaddilari hamda poytaxtdagi barcha mahalla fuqarolar yig‘inlari raislari ishtirok etdi. Yig‘ilishda jami 1 200 nafarga yaqin mas’ul va rahbar qatnashdi.
Tadbir davomida ko‘chalar, hovlilar, ariq va xiyobonlarni obodonlashtirish, ko‘kalamzorlashtirish ishlarini jadallashtirish, mahallalardagi infratuzilma muammolarini bartaraf etishga qaratilgan loyihalarni ishlab chiqish, ishsiz fuqarolarni daromadli mehnatga yo‘naltirish hamda kommunal xizmatlar faoliyatini yaxshilash bo‘yicha mas’ullarga aniq topshiriqlar berildi.
Qayd etilishicha, ushbu chora-tadbirlar mahallalarda obod muhit yaratish, infratuzilmani rivojlantirish, aholi bandligini oshirish va hududlarni kuz-qish mavsumiga puxta tayyorlashga xizmat qiladi.
