Moliyaviy inqirozdagi “Bunyodkor”ga byudjetdan 5 mlrd so‘m ajratildi
Mablag‘ Prezidentning sport sohasini moliyalashtirishga oid qarori asosida berildi.
Toshkentning moliyaviy qiyinchiliklarni boshdan kechirayotgan “Bunyodkor” futbol klubiga davlat tomonidan 5 milliard so‘m mablag‘ ajratildi. Bu haqda klub matbuot xizmati ma’lum qildi.
Qayd etilishicha, mablag‘ O‘zbekiston Prezidentining 2026-yil 24-martdagi PQ–107-sonli “Sport sohasini moliyalashtirish mexanizmlarini takomillashtirish va sohaga tadbirkorlik sub’yektlarini jalb qilishni kengaytirish chora-tadbirlari to‘g‘risida”gi qarori asosida ajratilgan.
Klub bayonotida hukumat tomonidan amaliy yordam ko‘rsatila boshlagani ta’kidlanib, davlat rahbari hamda hukumat vakillariga futbolni rivojlantirish yo‘lidagi e’tibor va qo‘llab-quvvatlash uchun minnatdorlik bildirildi.
Shuningdek, “Bunyodkor” jamoasi O‘zbekiston Superligasining navbatdagi uchrashuvlariga belgilangan reja asosida tayyorgarlikni davom ettirayotgani qayd etildi.
