Namangan va Toshkent viloyatlarida qariyb 12 kg giyohvandlik vositasi musodara qilindi
Tezkor tadbirlar davomida narkosavdogarlardan gashish, shuningdek, minglab AQSH dollari va millionlab so‘m pul mablag‘lari ashyoviy dalil sifatida olindi.
Namangan va Toshkent viloyatlarida o‘tkazilgan ko‘p bosqichli tezkor-qidiruv tadbirlari davomida qo‘shni davlatdan olib kelingan yirik miqdordagi giyohvandlik vositalari noqonuniy aylanmadan chiqarildi. Bu haqda DXX xabar berdi.
Namangan shahrida harakatlanayotgan “Nexia” rusumli avtomobil to‘xtatilib, ko‘zdan kechirilganda yo‘lovchilardan biriga tegishli sellofan paket ichidan 944 gramm gashish moddasi aniqlangan. Tergovga qadar tekshiruv davomida ushbu fuqaro giyohvandlik vositasini Namangan shahrida yashovchi shaxsdan 9 900 AQSH dollari evaziga sotib olgani ma’lum bo‘lgan.
Tezkor tadbirlarning navbatdagi bosqichida mazkur narkosavdogar qo‘lga olinib, undan 9 200 AQSH dollari hamda 18,4 million so‘m ashyoviy dalil sifatida olingan.
Shuningdek, Andijon viloyatida yashovchi ikki nafar shaxs harakatlanayotgan “Lacetti” avtomashinasidan 9 kilogramm 801 gramm gashish moddasi musodara qilingan.
Bundan tashqari, Toshkent viloyatining Bekobod shahrida o‘tkazilgan tezkor tadbir davomida narkokuryerlar tomonidan “zakladka” usulida yashirib ketilgan 977 gramm gashish moddasini olayotgan mahalliy fuqaro qo‘lga olingan.
Shu tariqa, har ikki hududdagi tezkor tadbirlar davomida jami 11 kilogramm 722 gramm (11,7 kg) giyohvandlik vositasi noqonuniy muomaladan chiqarilgan.
Mazkur holatlar yuzasidan gumonlanuvchilarga nisbatan jinoyat ishlari qo‘zg‘atilib, tergov harakatlari olib borilmoqda.
