Talabalar endi yotoqxonaga joylashish uchun alohida idoralarga murojaat qilmaydi

 

1-avgustdan boshlab talabalar turar joyiga joylashish va vaqtincha ro‘yxatdan o‘tish jarayoni soddalashtiriladi. Oliy ta’lim, fan va innovatsiyalar vazirligi matbuot xizmati xabar berdi.

 

Yagona interaktiv davlat xizmatlari portali (my.gov.uz) orqali endilikda talabalar turar joyiga joylashish uchun ariza yuborish hamda vaqtincha ro‘yxatdan o‘tish yagona kompozit xizmat orqali amalga oshiriladi.

 

Yangi tartibga ko‘ra, talabalar alohida hujjatlar to‘plashi yoki vaqtincha ro‘yxatdan o‘tish uchun boshqa idoralarga murojaat qilishi shart emas. Talabalar my.gov.uz portalidagi "Talabalar turar joyiga joylashish uchun ariza yuborish" xizmati orqali murojaat qiladi.

 

Ariza ma’qullangach, talabaga elektron shartnoma va yo‘llanma taqdim etiladi. Shartnomada belgilangan to‘lov amalga oshirilgach, tizim avtomatik ravishda vaqtincha ro‘yxatdan o‘tish jarayonini ishga tushiradi. Ro‘yxatdan o‘tish to‘lovi to‘langanidan so‘ng talabaga turgan joyi bo‘yicha vaqtincha ro‘yxatga olingani haqidagi qayd varag‘i elektron shaklda taqdim etiladi.

 

Vazirlar Mahkamasining 2023-yil 14-avgustdagi 376-son qaroriga muvofiq, dastlab imtiyoz va ustuvorlikka ega talabgorlar talabalar turar joylariga joylashtiriladi. Shundan so‘ng qolgan o‘rinlar umumiy navbat asosida taqsimlanadi. Bunda 1-bosqich talabalari uchun 55–65 foiz, 2-bosqich talabalari uchun 15–20 foiz, 3-bosqich va undan yuqori kurs talabalari uchun esa 20–25 foizgacha kvota ajratiladi.

 

2026/2027-o‘quv yili uchun arizalar 1-avgustdan o‘quv yili yakuniga qadar qabul qilinadi. Oliy ta’lim muassasalarining 1-bosqichiga tavsiya etilgan abituriyentlar esa yakuniy natijalar e’lon qilingach murojaat yuborishlari mumkin.