Toshkentda bolalar maydonchasi o‘rnidagi qurilish yuzasidan jinoyat ishi qo‘zg‘atildi

 

Toshkent shahrining Mirobod tumanida bolalar maydonchasi va sport o‘yingohi o‘rnida amalga oshirilgan noqonuniy qurilish ishlari yuzasidan jinoyat ishi qo‘zg‘atildi.

 

Ma’lum qilinishicha, joriy yilning 30-iyul kuni Mirobod tumanidagi holat o‘rganilgan. Tekshiruv davomida "Mahalla" xayriya jamoat fondi balansida bo‘lgan hudud keyinchalik "Al-Latif Hearts Tower" MCHJ tasarrufiga o‘tkazilgani hamda rekonstruksiya va qo‘shimcha bino-inshootlar qurish uchun tegishli ruxsat hujjatlari rasmiylashtirilgani aniqlangan.

 

Biroq, "Lolazor" MFY hududidagi ko‘p qavatli uylar aholisi mazkur hududda yangi bino qurilishiga qarshilik bildirgan. Shuningdek, "Mahalla" xayriya jamoat fondi bilan investor o‘rtasida tuzilgan investitsiya shartnomasi bekor qilingan.

 

Shunga qaramay, 2026-yil iyun oyida fond balansidagi 172 kvadrat metr maydondagi bino buzib tashlangani, buning oqibatida davlat manfaatlariga jiddiy zarar yetkazilgani aniqlangan.

 

Mazkur holat yuzasidan 2026-yil 27-iyul kuni Mirobod tumani prokuraturasi tomonidan "Al-Latif Hearts Tower" MCHJ mansabdor shaxslari hamda boshqa shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilgan.

 

Shuningdek, jamiyatning norasmiy rahbari sifatida ko‘rsatilayotgan Asliddin Ikromov gumon qilinuvchi tariqasida protsessual tartibda ushlangan.

 

Hozirda mazkur holat yuzasidan tergov harakatlari davom ettirilmoqda. Mas’ullarning xatti-harakatlariga huquqiy baho berish hamda bolalar maydonchasini avvalgi holatiga qaytarish bo‘yicha zarur choralar ko‘rilayotgani bildirildi.