Tramp Eronga yangi zarbalar berishni buyurdi — WSJ
Hujum shu hafta oxiri boshlanishi va bir necha kun davom etishi mumkin.
AQSh prezidenti Donald Tramp Eronga yangi harbiy zarbalar berish bo‘yicha buyruq bergani aytilmoqda. Bu haqda The Wall Street Journal (WSJ) o‘z manbalariga tayanib xabar berdi.
Nashr ma’lumotiga ko‘ra, AQSh harbiylari tomonidan amalga oshirilishi rejalashtirilayotgan hujum shu hafta oxiri boshlanishi va bir necha kun davom etishi mumkin.
WSJ manbalarining ta’kidlashicha, zarbalar bo‘yicha tayyorgarlik ishlari olib borilayotgan bo‘lsa-da, yakuniy qaror hali o‘zgarishi ehtimoldan xoli emas. Agar diplomatik muzokaralarda sezilarli siljish kuzatilsa yoki Tehron muloqotga tayyorligini amalda namoyish etsa, Donald Tramp rejalashtirilgan hujumni bekor qilishi mumkin. Manbalarga ko‘ra, prezident istalgan vaqtda o‘z qarorini o‘zgartirish imkoniyatiga ega.
Xabarda qayd etilishicha, hujum rejasi AQSh prezidentining Kemp-Deviddagi uchrashuvlari davomida ma’qullangan. Tramp avvalroq Eron rahbariyatini muzokaralarga majbur qilish uchun kuchli harbiy bosim zarurligini ta’kidlagan edi.
Bundan oldin CBS News ham o‘z manbalariga tayanib, AQSh va Isroil shu hafta oxiri Eronning energetika infratuzilmasiga zarbalar berishni rejalashtirayotgani, ushbu hujumlar hozirgacha kuzatilgan eng yirik harbiy amaliyotlardan biri bo‘lishi mumkinligini ma’lum qilgan edi.
Shuningdek, CNN manbalari ham AQSh Eronning yadroviy obyektlariga yana zarba berish ehtimoli mavjudligini bildirgan.
Eron rasmiylari esa bunday hujum amalga oshirilgan taqdirda, Tehron Yaqin Sharqdagi AQSh va Isroilning energetika infratuzilmasiga javob zarbalari berishga tayyor ekanini ma’lum qilgan.
