Toshkentdagi qurilish maydonida yer o‘pirilib tushdi
Toshkent shahar hokimligi hodisa yuzasidan rasmiy munosabat bildirib, maxsus komissiya tuzilganini ma’lum qildi.
Ijtimoiy tarmoqlarda Toshkent shahrining Olmazor tumani, Orzu massivi 3-uy manzilida joylashgan qurilish obyekti kotlovanining bir qismi o‘pirilgani haqida xabarlar tarqaldi. Xabarlarda ko‘p yillik daraxt qulab elektr simlarini uzib yuborgani, buning oqibatida “Orzu” mahallasi va unga tutash hududlarda elektr ta’minoti uzilgani hamda bir kishi jarohatlangani aytilmoqda.Toshkent shahar hokimligi hodisa yuzasidan rasmiy munosabat bildirdi.
Hokimlik ma’lumotiga ko‘ra, ayni paytda hodisa oqibatida jabrlanganlar yoki tibbiy yordam so‘rab murojaat qilgan fuqarolar qayd etilmagan.
Qayd etilishicha, vaziyat Toshkent shahar hokimining shaxsiy nazoratiga olingan. Uning topshirig‘i bilan Toshkent shahar Favqulodda vaziyatlar boshqarmasi, Qurilish va uy-joy kommunal xo‘jaligi sohasini nazorat qilish inspeksiyasi, prokuratura organlari, Olmazor tumani hokimligi hamda boshqa mutasaddi idoralar vakillaridan iborat tezkor maxsus komissiya tuzilgan.
Hozirda hodisa joyida fuqarolar xavfsizligini ta’minlash, xavfli hududni o‘rab olish va unga kirishni cheklash bo‘yicha zarur choralar ko‘rilmoqda. Mutaxassislar yer o‘pirilishining sabablari, shuningdek, yondosh hudud, yo‘l qoplamasi va muhandislik kommunikatsiyalarining holatini o‘rganmoqda.
Hokimlik tekshiruv yakunlariga ko‘ra, mas’ul shaxslarning harakatlariga huquqiy baho berilishi, shaharsozlik qonunchiligi va qurilish me’yorlarini buzgan shaxslar belgilangan tartibda javobgarlikka tortilishini ma’lum qildi.
