Andijonda ommaviy mushtlashuv qilgan 7 nafar ayol 5 sutkaga qamaldi
Mojaro Instagram ijtimoiy tarmog‘ida boshlangan o‘zaro haqoratlar oqibatida yuzaga kelgan.
Andijon shahrida bir guruh ayollar o‘rtasida sodir bo‘lgan ommaviy janjal yuzasidan sud qarori chiqarildi. Hodisada ishtirok etgan 7 nafar ayolga 5 sutkadan ma’muriy qamoq jazosi tayinlandi.
Viloyat Ichki ishlar boshqarmasi ma’lumotiga ko‘ra, voqea 30-iyul kuni soat 12:30 atrofida Andijon shahridagi ko‘p qavatli uylar hududida sodir bo‘lgan. 102 qisqa raqamiga kelib tushgan murojaat asosida voqea joyiga yetib borgan ichki ishlar xodimlari fuqarolar jamoat tartibini qo‘pol ravishda buzib, o‘zaro janjallashayotganini aniqlagan.
Huquqiy baho berish maqsadida ular ichki ishlar organiga olib borilgan. Biroq ayrim ayollar bu yerda ham xodimlarning qonuniy talablariga bo‘ysunmay, o‘zaro haqorat va janjalni davom ettirgan.
Tergovga qadar o‘tkazilgan tekshiruv davomida mojaro Instagram ijtimoiy tarmog‘ida boshlangan o‘zaro haqoratlar oqibatida yuzaga kelgani aniqlangan.
To‘plangan hujjatlar Jinoyat ishlari bo‘yicha Andijon shahar sudiga yuborilgan. Sud qarori bilan 7 nafar ayol Ma’muriy javobgarlik to‘g‘risidagi kodeksning 183-moddasi (mayda bezorilik) hamda 194-moddasi (ichki ishlar organi xodimining qonuniy talabini bajarmaslik) bo‘yicha aybdor deb topilib, ularning har biriga 5 sutkadan ma’muriy qamoq jazosi tayinlangan.
