AQSH 50 ta davlatlar fuqarolari uchun vizaga 20 ming dollargacha depozit joriy qiladi
Oʻzbekiston ushbu roʻyxatga kiritilmagan.
AQSH Davlat departamenti 2026-yil 3-avgustdan boshlab ayrim davlatlar fuqarolari uchun sayyohlik (B-2) va biznes (B-1) vizalarini rasmiylashtirishda depozit (garov puli) tizimini doimiy asosda joriy etishini ma’lum qildi.
Yangi tartibga ko‘ra, konsullik xodimlari viza berish sharti sifatida murojaatchidan 20 ming AQSH dollarigacha depozit talab qilishi mumkin. Garov puli AQSH hududini belgilangan muddatda tark etish majburiyatini ta’minlash maqsadida olinadi.
Mazkur tizim ilk bor 2025-yil avgust oyida sinov tariqasida joriy etilgan bo‘lib, o‘shanda 5 ming, 10 ming va 15 ming dollargacha depozit undirish amaliyoti qo‘llangan edi. Endilikda ushbu mexanizm doimiy tartibda amal qiladi.
Davlat departamenti ma’lumotiga ko‘ra, yangi tartib 50 ta davlat fuqarolariga tatbiq etiladi. Ro‘yxatdan asosan Afrika mamlakatlari, shuningdek, Qirg‘iziston va Tojikiston o‘rin olgan. O‘zbekiston va Rossiya ushbu ro‘yxatga kiritilmagan.
Shuningdek, AQSH hukumati immigratsiya nazoratini kuchaytirishda davom etmoqda. Avvalroq Amerika OAVlari mamlakat aeroportlarida vizasi muddati o‘tgan xorijiy fuqarolarni aniqlash va ushlash bo‘yicha reydlar o‘tkazilayotgani haqida xabar bergan edi. Ichki xavfsizlik departamenti bunday choralar noqonuniy migratsiyaning oldini olishga qaratilganini bildirgan.
