Buxoroda “hujra” tashkil qilib, noqonuniy diniy ta'lim berib kelgan shaxs ushlandi
Shuningdek, farzandlarini maktabga yubormay, hujraga bergan ota-onalar ham jazolandi.
Buxoro viloyatining Romitan tumanida voyaga yetmagan bolalarga noqonuniy diniy ta’lim berib kelgan shaxs hamda bunga sharoit yaratgan ota-onalar aniqlandi. Bu haqda Ichki ishlar vazirligi Axborot xizmati ma’lum qildi.
Qayd etilishicha, joriy yilning 24-iyul kuni huquqni muhofaza qiluvchi organlar tomonidan Romitan tumani “Qal’ayichorbog‘” mahallasida o‘tkazilgan tezkor tadbir davomida fuqaroning o‘z uyida yashirin diniy hujra tashkil etgani fosh etilgan.
Aniqlanishicha, mazkur shaxs maxsus diniy ma’lumotga ega bo‘lmagan holda voyaga yetmagan bolalarga noqonuniy ravishda diniy ta’lim berib, ularga turli topshiriq va vazifalar yuklab kelgan.
Mazkur holat yuzasidan unga nisbatan Jinoyat kodeksining 229-2-moddasi 2-qismi (diniy ta’limotdan saboq berish tartibini buzish) bilan jinoyat ishi qo‘zg‘atilib, tergov harakatlari olib borilmoqda.
Shuningdek, farzandlarini umumta’lim muassasalariga yubormasdan, ularning norasmiy diniy ta’lim olishi uchun sharoit yaratgan ota-onalarga nisbatan Ma’muriy javobgarlik to‘g‘risidagi kodeksning 47-moddasi (bolalarni tarbiyalash va ularga ta’lim berish majburiyatlarini bajarmaslik) asosida qonuniy choralar qo‘llanilgan.
