Farg‘onada sobiq xotiniga shilqimlik qilgan erkak 5 sutkaga qamaldi
Jabrlanuvchini haqorat qilgan kundoshi uchun 2 mln so‘mdan ortiq jarimaga tortildi.
Farg‘ona viloyatida sobiq turmush o‘rtog‘iga nisbatan jinsiy zo‘ravonlik sodir etgan erkak ma’muriy javobgarlikka tortildi. Shuningdek, jabrlanuvchini haqorat qilgan uning ikkinchi xotini ham sud qarori bilan jarimaga tortildi.
Sud hujjatlariga ko‘ra, hodisa 2026-yil 18-aprel kuni Farg‘ona viloyati O‘zbekiston tumani, Yaypan shahridagi avtobus bekatida yuz bergan.
1991-yilda tug‘ilgan erkak sobiq turmush o‘rtog‘ini bekatda uchratib qolib, uni chetga tortgan, majburan quchoqlab, o‘pishga uringan. Jabrlanuvchining suddagi ko‘rsatmasiga ko‘ra, u erkakni itarib yuborgan.
Shu kuni kechqurun erkakning ikkinchi xotini jabrlanuvchiga telefon qilib, uni haqorat qilgan hamda sha’ni va qadr-qimmatini kamsituvchi so‘zlar ishlatgan.
Sud majlisida har ikki shaxs o‘z aybiga iqror bo‘lib, qilmishidan pushaymon ekanini bildirgan va yengilroq jazo tayinlanishini so‘ragan.
Sud qaroriga ko‘ra, erkak Ma’muriy javobgarlik to‘g‘risidagi kodeksning 41-1-moddasi (jinsiy zo‘ravonlik) bilan aybdor deb topilib, 5 sutka ma’muriy qamoq jazosiga hukm qilingan.
Uning ikkinchi xotini esa 41-moddasi (haqorat qilish) bilan aybdor deb topilib, 5 BHM, ya’ni 2 million 60 ming so‘m miqdorida jarimaga tortilgan.
