Fransiyada o‘rmon yong‘inlari bo‘yicha 375 kishi qo‘lga olindi
Ularning 142 nafari voyaga yetmaganlar ekanligi ma'lum qilindi.
Fransiyada o‘rmon yong‘inlariga aloqadorlikda gumon qilinib, 375 kishi qo‘lga olindi. Bu haqda mamlakat Ichki ishlar vazirligi ma’lumotlariga tayanib mahalliy OAV xabar berdi.
Ma’lum qilinishicha, yoz mavsumi boshidan buyon o‘rmon yong‘inlariga aloqadorlikda jami 375 nafar gumondor qo‘lga olingan. Ularning 142 nafari voyaga yetmaganlar ekani qayd etilgan.
Rasmiy ma’lumotlarga ko‘ra, qo‘lga olinganlardan 36 nafari qamoq jazosiga hukm qilingan yoki sud qarorigacha hibsda saqlanmoqda.
So‘nggi haftalarda Fransiyaning Jironda, Od va Sena-et-Marn hududlarida bir nechta yirik o‘rmon yong‘inlari kuzatilgan. Mutasaddilar ayrim yong‘inlar yuqori harorat va qurg‘oqchilik oqibatida yuzaga kelganini, boshqalari esa inson omili bilan bog‘liq bo‘lishi mumkinligini bildirmoqda.
Fransiya Ichki ishlar vaziri Loran Nunez iyul oyida qayd etilgan yong‘inlarning uchdan ikki qismi qasddan sodir etilganini, qolganlari esa ehtiyotsizlik oqibatida yuz berganini ma’lum qilgan.
Shuningdek, hukumat mamlakatdagi yong‘inlar ustidan nazorat kuchaytirilganini bildirgan. Ayni paytda ayrim hududlarda yong‘inlarni bartaraf etish ishlari davom etmoqda. Yevropa Ittifoqi ham o‘rmon yong‘inlariga qarshi kurashish uchun maxsus aviatsiya va yuzlab o‘t o‘chiruvchilarni safarbar qilgan.
