O‘zbekiston maktab va OTMlarida xavfsizlikning yangi tartibi joriy etiladi

Vazirlar Mahkamasining 2026-yil 31-iyuldagi 425-son qarori bilan davlat ta'lim muassasalari, nodavlat ta'lim tashkilotlari hamda xorijiy davlatlar ta'lim tashkilotlari filiallarining xavfsizligini ta'minlashning yangi tartibi tasdiqlandi. Hujjat ta'lim muassasalarida xavfsizlik tizimini zamonaviy talablar asosida tashkil etish va o‘quvchilar, talabalar hamda pedagoglar xavfsizligini kuchaytirishga qaratilgan.

Qarorga muvofiq, ta'lim muassasalarining asosiy kirish joylarida nazorat-o‘tkazish punktlari hamda zamonaviy kirish-chiqishni nazorat qilish tizimlari tashkil etiladi. Kirish va chiqish haqidagi ma'lumotlar elektron tarzda qayd etilib, kamida uch oy davomida saqlanadi. Shuningdek, hududga kirish biometrik identifikatsiya, barmoq izi, ko‘z gavhari yoki qonunchilikda ruxsat etilgan boshqa identifikatorlar orqali amalga oshirilishi mumkin. Barcha kirish-chiqishlar elektron jurnalga kiritiladi.

Yangi nizomga ko‘ra, ta'lim muassasalari hududiga begona shaxslarning ruxsatsiz kirishiga yo‘l qo‘yilmaydi. Tashrif buyuruvchilar belgilangan tartib asosida ro‘yxatdan o‘tkazilib, ularning kirib-chiqishi nazorat qilinadi. Shu bilan birga, maktablar, akademik litseylar, kollejlar, texnikumlar va oliy ta'lim muassasalarining asosiy kirish joylari, nazorat-o‘tkazish punktlari, yo‘laklar, oshxonalar, sport maydonlari hamda boshqa muhim hududlari zamonaviy videokuzatuv kameralari bilan jihozlanadi. Videoyozuvlar kamida bir oy davomida saqlanishi belgilangan.

Hujjatda favqulodda vaziyatlarda tezkor xabar berish, qo‘riqlash signalizatsiyasi va boshqa xavfsizlik tizimlarini joriy etish ham nazarda tutilgan. Shuningdek, ta'lim muassasalari xavfsizligini ta'minlash bo‘yicha mas'ul xodimlarning vazifalari, texnik vositalarga qo‘yiladigan talablar hamda ichki xavfsizlik tartiblari aniq belgilab berilgan.