Oʻzbekistonda bolalar savdosi uchun alohida jinoiy javobgarlik joriy etiladi
Odam savdosi bilan bog‘liq jinoyat sodir etganlarning mehnat va tashqi migratsiya sohasida faoliyat yuritish huquqi cheklanadi.
Oʻzbekistonda bolalar savdosi uchun alohida jinoiy javobgarlik belgilanadi. Shuningdek, odam savdosi bilan bogʻliq jinoyatlarni sodir etgan shaxslarning mehnat va tashqi migratsiya sohasida faoliyat yuritish huquqini cheklash rejalashtirilmoqda.
Prezident Shavkat Mirziyoyev maxsus taʼlim ehtiyojlariga ega bolalarni taʼlim va ijtimoiy xizmatlar bilan qamrab olishni kengaytirish, uysizlar hamda odam savdosi qurbonlarini qoʻllab-quvvatlash, shuningdek subsidiyalangan transport xizmatlarini raqamlashtirishga oid takliflar taqdimoti bilan tanishdi.
Unga koʻra, 2026-yil 1-sentabrdan boshlab mahalla va tuman darajasidagi “Inson” markazlari orqali odam savdosi qurbonlarining ehtiyojlarini baholash tizimi yoʻlga qoʻyiladi hamda ular zarur ijtimoiy xizmatlarga yoʻnaltiriladi.
Shuningdek, Respublika Ayollarni reabilitatsiya qilish va moslashtirish markazi hamda uning hududiy boʻlinmalari Respublika Ayollar va bolalarni reabilitatsiya qilish markazi sifatida qayta tashkil etiladi. Qoraqalpogʻiston, Qashqadaryo, Samarqand va Fargʻona viloyatlaridagi markazlarda odam savdosi qurboni boʻlgan ayollar va ularning voyaga yetmagan farzandlari uchun qoʻshimcha 40 ta oʻrin tashkil etiladi.
Bundan tashqari, bolalar savdosi uchun alohida jinoiy javobgarlikni belgilash, odam savdosi bilan bogʻliq jinoyat sodir etgan shaxslarning mehnat va tashqi migratsiya sohasidagi faoliyatini cheklash hamda mazkur yoʻnalishdagi xizmatlar ustidan muntazam monitoring oʻrnatish taklif etildi.
