Seutaga noqonuniy o‘tishga uringan migrantlar orasida halok bo‘lganlar soni 72 nafarga yetdi
Qurbonlar orasida 20 yoshli futbolchi ham bor.
Marokashdan Ispaniyaning Seuta anklaviga noqonuniy ravishda o‘tishga uringan minglab migrantlar bilan bog‘liq fojiada halok bo‘lganlar soni kamida 72 nafarga yetdi. Bu haqda Reuters agentligi xabar berdi.
Ma’lumotlarga ko‘ra, qurbonlar orasida Marokashning “Mag‘rib Atletiko” futbol klubida to‘p surgan 20 yoshli futbolchi Faten Ben Omar el-Aziz ham bor.
30-iyul kuni boshlangan ommaviy migratsiya oqimi davomida 50 mingdan ortiq kishi quruqlik va dengiz orqali Seuta hududiga kirishga uringan. Ayrim migrantlar dengizda cho‘kib ketgan, boshqalari esa chegara to‘siqlaridan oshishga urinish chog‘idagi tiqilinch oqibatida halok bo‘lgan.
Ispaniya rasmiylari so‘nggi 48 soat ichida 48 mingga yaqin migrant Marokashga qaytarilganini ma’lum qildi. Seuta ma’muriyati ma’lumotiga ko‘ra, hodisalar davomida 1 mingdan ortiq kishi tibbiy yordam olgan.
Marokash Ichki ishlar vazirligi avvalroq 11 nafar qurbon haqida ma’lum qilgan bo‘lsa-da, keyinchalik xalqaro OAVlar halok bo‘lganlar soni 72 nafarga yetganini xabar qildi. Rasmiylar qurbonlar soni va hodisa tafsilotlari yuzasidan tekshiruvlarni davom ettirmoqda.
