Toshkentda mast yo‘lovchi avtobus haydovchisini kaltakladi
U avtobus oynasini sindirib, transportga ham zarar yetkazgan.
Toshkent shahrida mast holatdagi yo‘lovchi avtobus salonida janjal ko‘tarib, transport vositasining old oynasini sindirdi hamda haydovchiga hujum qildi. Bu haqda Toshkent shahar IIBB xabar berdi.
Ma’lum qilinishicha, hodisa joriy yil 1-avgust kuni soat 14:30 atrofida 98-yo‘nalishda harakatlanayotgan avtobusda sodir bo‘lgan.
Dastlabki ma’lumotlarga ko‘ra, muqaddam sudlangan, 1982-yilda tug‘ilgan D.P. mast holatda avtobus salonida jamoat tartibini buzib, haydovchining faoliyatiga to‘sqinlik qilgan va janjal chiqargan.
Haydovchi — 1988-yilda tug‘ilgan R.Ya. huquqbuzarni avtobusdan tushirayotgan vaqtda, yo‘lovchi avtobusning old oynasiga musht bilan zarba berib, uni sindirgan.
Shundan so‘ng, D.P. haydovchining bo‘yin va yuz qismiga bir necha marotaba urib, unga tan jarohati yetkazgan.
Mazkur holat yuzasidan Chilonzor tumani Ichki ishlar organlari tomonidan tergovga qadar tekshiruv o‘tkazilmoqda. Yakuniga ko‘ra, qonuniy qaror qabul qilinishi ma’lum qilindi.
