Toshkentda yana bir yo‘nalishda “Yashil to‘lqin” svetofor tizimi ishga tushirildi

 

Toshkent shahrida transport harakatini samarali tashkil etish maqsadida “Yashil to‘lqin” tizimini bosqichma-bosqich joriy etish ishlari davom etmoqda. Markaziy yo'l harakatini boshqarish markazi matbuot xizmati xabar berdi.

 

Yo‘l harakatini tashkil etish markazi mutaxassislari Kichik halqa avtomobil yo‘lining Bog‘ibuston ko‘chasi bilan kesishmasidan “Chilonzor” metro bekatigacha bo‘lgan 1,7 kilometrlik yo‘nalishdagi 5 ta svetoforning ish rejimini hisoblab chiqib, ularni o‘zaro sinxronlashtirdi.

 

Mazkur yo‘nalishda ilk bor “Yashil to‘lqin” tizimi sutka davomida har ikki yo‘nalishda bir vaqtning o‘zida ishlaydigan tartibda yo‘lga qo‘yildi. Bunga ushbu yo‘lda transport oqimining ikki tomonda ham deyarli teng bo‘lishi imkon yaratdi.

 

Hisob-kitoblarga ko‘ra, tizim joriy etilishidan avval ushbu yo‘l qismini bosib o‘tish uchun o‘rtacha 5 daqiqa vaqt talab etilgan bo‘lsa, hozirda bu ko‘rsatkich 2 daqiqa 45 soniyagacha qisqardi. Natijada harakatlanish vaqti qariyb 45 foizga kamaygan.

 

Qayd etilishicha, haydovchilar belgilangan 40–60 km/soat tezlikka amal qilgan holda harakatlansa, chorrahalarda svetoforning qizil chirog‘ida to‘xtamasdan yo‘lni uzluksiz bosib o‘tishi mumkin.

 

Hozirgi kunga qadar “Yashil to‘lqin” tizimi poytaxtning umumiy uzunligi 5,7 kilometr bo‘lgan ikki yo‘l qismidagi 18 ta tartibga solinadigan chorrahani qamrab olgan. Ushbu yo‘nalishlarda transport vositalarining harakatlanish vaqti o‘rtacha 30 foizga qisqargan.

 

Avvalroq Markaz «Yashil to‘lqin» tizimining dastlabki bosqichini Buyuk Ipak Yo‘li ko‘chasining «To‘ra Buva» masjididan Salom ko‘chasigacha bo‘lgan qismida ishga tushirgan edi. Mazkur yo‘nalishdagi 13 ta chorrahada svetoforlar faoliyati o‘zaro sinxronlashtirilgan.

 

Yo‘l harakatini tashkil etish markazi tomonidan Toshkentning boshqa ko‘chalarida ham “Yashil to‘lqin” tizimini joriy etish bo‘yicha hisob-kitob va sozlash ishlari davom ettirilmoqda.